
Gipadayag ni House Prosecution Spokesperson Representative Zia Alonto Adiong nga layo matud pa sa sentrong hisgutanan sa Article II sa impeachment complaint ang nahimong testimonya sa duha ka testigo sa depensa ni Vice President Sara Duterte.
Mipahayag si Adiong nga ang nag-unang gikinahanglan nga mahatagan og katin-awan kay ang matud pa dili hustong deklarasyon sa mga kabtangan sa Bise Presidente ug ang kadudahang transaksyon nga niabot sa halos 1.5 bilyon pesos nga gitahong na-flag sa Anti-Money Laundering Council (AMLC).
Matud ni Adiong, walay napakita nga igong katin-awan ang mga testigo bahin sa pasulod nga remittance sa mga corporate bank account sa mga kompanya nga nalambigit sa maong hisgutanan.
Dugang pa ni Adiong, nakatutok lamang ang testimonya ni Rodolfo sa pagkuha sa Cale88 og mga permit ug sertipikasyon aron maka-operate isip export franchise, samtang ang presentasyon usab ni Pagayunan kay bahin sa rehistrasyon sa banana chips sa kompanya.
Alang kang Adiong, wala niini matubag ang mga pangutana sa Article II, partikular na sa mga alegasyon kabahin sa kabtangan sa Bise Presidente nga wala matud pa hustong nadeklara ug ang mga kadudahang transaksyon nga gipunting sa prosekusyon.
Gilaumang mobalik ug magpadayon ang impeachment trial sa Disyembre 1 human wala madayon ang una nang gitakdang pagdungog sa Nobyembre 26 ug 27 tungod matud pa kay dili available ang mga musunod nga testigo sa depensa. (raniel mahunyag)


