Gipangunahan sa Cagayan de Oro Chamber of Commerce and Industry Foundation ang pagdani og mga dagkong negosyante sa renewable energy, sewerage treatment, ug cold chain facilities aron panalipdan ang lokal nga ekonomiya batok sa stagflation.
Gibutyag ni Oro Chamber President Engr. Almarico Brito nga nakig alayon ang grupo sa lokal nga kagamhanan ug sa Chinese Chamber sulod sa Investment and Incentive Council aron mapadali ang pagsulod sa mga negosyo ug mapaubos ang gasto sa pagnegosyo dinhi sa dakbayan.
Gipasabot ni Brito nga ubay ubay na nga dagkong property developers ang mipili nga mobubo og puhunan sa Cagayan de Oro lakip na ang pagpalambo sa fish landing sa Barangay Bulua.
Gidugang sa opisyal nga pinaagi sa pag imbitar og mga cold chain operators, mapreserbar na ang mga produkto sa agrikultura ug dili na kini madaut tungod sa kakuwang sa pasilidad.










