CAGAYAN DE ORO CITY – Gipasalig ni DILG Secretary Benjamin Abalos Jr nga nganlan,kasuhan ug dili lang ipa-retiro kadtong mga heneral ug koronel sa pulis nga makit-ang dunay direktang kalambigitan sa ilegal nga droga dinhi sa nasud.
Kini ang tubag ni Abalos sa pangutana sa Bombo Radyo Philippines atol sa ilang pag-atubang ni PNP chief Gen Rodolfo Azurin Jr aron e-update ang katawhan kabahin sa halos libo ka PNP 3rd level officers nga gipa-courtesy resignation gumikan sa maong isyu.
Siya miingon nga human sa maong mga opisyales,gilayong isunod sa pag-imbestigar ang anaa sa ubos nga mga ranggo sa PNP may kalabutan sa ilang posibleng kalambigitan sa ilegal nga droga.
Samtang unang namugos ang Police Regional Office 10 nga dili special treatment ang pagdumili sa ilang kadagkuan nga nganlan kadtong heneral ug koronel sa PNP nga makit-ang dunay direktang illegal drug involvements.
Kini human nabantayan nga mas dali ngalan ang mga ordinaryong tawo nga nakahimo’g lesser offense kaysa mga dagkong ranggo sulod sa PNP ug nagbaton sa seryosong mga alegasyon.
Miingon si PRO 10 spokesperson Police Maj Joann Navarro nga dili pagtabon sa ilang mga kabaro ang gihimo sa ilang kadagkuan apan pagsiguro lamang nga lig-on ang huptang ebedensiya aron dunay maduso nga kasong administratibo ug kriminal pag-abot sa korte.
Hisayrang may duha ka heneral ug 17 ka koronel ang rehiyon nga miduso’g courtesy resignation ngadto sa kauluhan.
