CAGAYAN DE ORO CITY-Gipangandaman na sa Misamis Oriental PNP ang posibleng mga hitabo nga makabalda sa ikatulo nga State of the Nation Address o SONA sunod semana.
Miingon si Sr/Insp Arlyn Ranario, tigpamaba sa Misamis Oriental PNP nga gi-alerto na ang tanang commanders sa kapolisan aron dili masakyan sa grupo sa mga dautang tawo ang kalihukan sa mohimo’g panagtigom sa SONA ni Pres Duterte.
Gihangyo ni Ranario ang publiko nga mosunod lamang sa security measures nga gipatuman nila kauban ang mga sundalo aron mamintinar ang kahusay’g kalinaw sa lalawigan.
Gikatag na usab sa 4th ID, Philippine Army ang ilang tropa sa mga lugar diin sagad dagsaon sa katawhan ilabina sa pagbatbat ni Pres Rodrigo Duterte sa SONA.
Kini isip pag-abag sa kapolisan nga gitahasan usab nga mamintinar ang kahusay’g kalinaw sa maong kalihukan.
Miingon si 4th ID spokesperson 1Lt Tere Inghente nga dili lamang usab angay magsalig ang publiko apan mag-alerto sa mga tawo nga anaa sa ilang palibot.
Nasayran nga gilauman ang pagdagsa sa mga progresibong pundok diin sentro sa ilang mga batikos ang mga palpak sa gobierno ubos ni Duterte.
