CAGAYAN DE ORO CITY-Dili pa wad-on sa militar ang martial law nga gipatuman sa gobierno sa Mindanao.
Kini bisan gideklarar na ni Pres Rodrigo Duterte ang kagawasan batok teroristang Maute-ISIS ang Marawi City epektibo kagahapong adlawa.
Matud ni AFP spokesperson Maj Gen Restituto Padilla nga daghang armadong pundok pa ang angay bungkagon sa militar sa ubang bahin sa Mindanao.
Unang gimando ni Duterte ug suportado sa kongreso nga molungtad ang martial law sa Disyembre pa ning
tuiga.
Samtang bisan ang pipila ka elected officials sa Autonomous Region in Muslim Mindanao o ARMM ang supak sa sugyot sa mga senador nga wad-on na ang martial law sa Mindanao.
Kini bisan napatay sa militar sila Omar Maute ug Isnilon Hapilon nga nangulo sa Maute-ISIS aron gubuton ang Marawi City.
Gibutyag ni ARMM 1st District Assemblyman Zia Alonto Adiong nga dili pa kanunay ang kahusay sa maong syudad
hinungdang angay una magpabilin ang martial law.
Dugtong niini,gihupay ni Padilla ang kabalaka nga subli makamugna’g kagubot ang nabiling 30 ka Maute-ISIS members sulod sa main battle area sa Marawi City.
Kini human milugwa ang report nga si Malaysian Dr Mahmud Ahmad alyas Abu Handzalah ang mihulip kanila ni Omar Maute ug Isnilon Hapilon aron makig-away sa militar.
Kumpiyansa si Padilla nga dili susama’g abilidad ni Omar ug Hapilon si Ahmad hinungdan nga mapasayon ang ilang pagpulbos sa nabiling mga terorista.
