Mosuhop sa hangtod tulo ka gigawatts o katumbas sa tulo ka milyon ka kilowatts kada adlaw ang gitinguhang Pax Silica AI hub sa New Clark City sa Tarlac sa higayon nga hingpit na kining mapatuman.
Gibutyag kini ni Bases Conversion and Development Authority president ug CEO Joshua Bingcang atol sa usa ka briefing sa Palasyo aron tubagon ang mga pagsaway sa mga grupo sa kinaiyahan kalabot sa grabeng konsumo sa enerhiya ug tubig sa proyekto.
Matod pa sa opisyal, bisan pa man sa maong kadako sa konsumo, gisiguro niya nga dili kini makaapekto sa kasamtangang suplay sa kuryente sa nahisgutang dapit.
Gawas pa niana, gipasabot usab niya nga ang pasilidad magsalig sa renewable energy pinaagi sa solar power gikan sa ilang giplano nga embedded power plant aron malikayan ang paggamit sa fossil fuels.
Sa pagkakaron, gipadayag ni Bingcang nga aduna na silay gikasigurong lima ka gatos ka megawatts nga solar power samtang gihikay pa ang feasibility study sa proyekto nga gilauman nga sugdan ang konstruksyon sa tuig 2028.
