CAGAYAN DE ORO CITY – Nagka-away kabahin sa salapi ang babayeng menor de edad ug ang suspek nga lalaki nga nag-resulta sa ngilngig nga dugu-ong kremin sa Mambato,Agora,Brgy Lapasan ning syudad.
Kini ang pagsaysay sa suspek nga si Sanny Boy Ratunil alyas Boy Tangkong pipila ka oras sa iyang pagkasulod sa selda sa Agora Police Station 3 ning syudad.
Bersyon sa dinakpan nga si Boy Tangkong nga nangayo’g balor 400 pesos nga salapi ang biktima nga si Diane Jane apan wala kini mahatagi hinungdan nga nasuko kaniya.
Dugang saysay niini nga unang nanigbas ang biktima ngadto sa tiil sa suspek rason nga adunay komosyon.
Giangkon ni Tangkong nga mismo siya ang nakapatay sa biktima gamit ang iyang gidala-dala nga sundang hinungdang gitago niya kini ilawom sa lapok ayha paspas nga misibat padulong sa Misamis Oriental.
Nagdumili na usab kini mohatag komento kabahin sa hitabo kay sa korte na niya isaysay ang iyang dugang depensa.
Una niini,gipaubos sa otopsiya ang patay’ng lawas sa biktima aron sutaon kung tinood nga gilugos una sa suspek ayha gipatay.
Hisayrang taga-Sultan Naga Dimaporo, Lanao del Norte ang biktima ug giingong nanimpalad lang dinhi sa syudad sugod Disyembre 2024.
