CAGAYAN DE ORO CITY – Nasikop ang duha ka lalaki nga nagbaton sa 500 gramos nga gitoohang shabu diin nagbalor sa 3 milyon pesos diha sa police checkpoint sa Brgy Amoros,El Salvador City,Misamis Oriental kaganihang buntag.
Giila ang mga suspek nga sila si Jay Badi nga taga- Fair View, Upper Carmen ug Nicholson Prais nga nagpuyo Brgy Bayabas Brgy Bayabas ning syudad.
Miingon si El Salvador Police Station commander Lt Col Randy Anito nga unang nabantayan ang depektoso nga plate number sa pribadong sakyanan nga gimaneho sa mga suspek hinungdan gisitar sa checkpoint personnel.
Misugat sa mga otoridad ang tulo ka dagkong cellophane nga may sulod nga shabu hinungdan sila ang gipangdakop ug gitakdang kasuhan sa piskalya sunod semana.
Samtang gihimakak sa mga suspek nga sila ang tag-iya sa balor 3 milyon pesos nga gitoohang shabu nga nakuha gikan sa gisakyan nila nga pribadong sakyanan sa maong lugar.
Gibutyag sa suspek nga si Badi nga igo ra siya mi-renta sa salakyan ug naghatod sa pasahero sa Laguindingan Airport ug mipadulong sa Iligan City ayha pabalik unta dinhi sa dakbayan.
Miingon si Badi nga dili sila ang tag-iya sa gipasangil sa PNP nga 500 gramos nga shabu hinungdan natingala sila pag-ayo niini.
