CAGAYAN DE ORO CITY- Gipadumduman sa Commission on Elections o Comelec-10 ang mga kandidato nga gidili ang mangampaniya sugod karong adlawa hangtud Biyernes Santo.
Gibutyag ni Comelec-10 regional director Atty Jay Balisado nga gidid-an usab nila ang mga kandidato nga magsul-ob sa mga sinina nga kolor sa ilang partido.
Ginadili usab ang pagpanghatag tubig ingon man mga pagkaon nga adunay pangalan sa kandidato.
Gani, giawhag ni Balisado ang publiko nga kuhaa’g hulagway e-report ang mga kandidato nga mosupak sa ilang gabayan.
Samtang respeto sa semana Santa.Kini ang mensahe sa Department of Interior and Local Government -10 sa mga kandidato nga naglaraw magpapili sa May 2019 midterm elections.
Sumala ni DILG-10 regional director Eduard Bagwani nga walay gipaggawas nga gabayan ang ilang ahensiya alang sa mga kandidato ning panahon sa kuwaresma apan nanghinaut siya nga dili kalimtan ang espiritohanong pagtoo nga maoy sentro sa selebrasyon sa maong kasaulogan.
Nanawagan si Bagwani sa mga kandidato nga mas maayo nga mag-pokus sila sa pagpamalandong sa Mahal nga Adlaw ug kalimtan una ang pagpangampaniya ilabina nga daghan pang adlaw nga ila kining mahimo.
