CAGAYAN DE ORO CITY – Gi-limitahan sa Civil Service Commission pinaagi sa ilang gipalugwa nga memo circular no.03 series of 2025 ang mga empleyado sa gobierno nga dayag makahimo’g pagpamulitika sulod sa mga opisina niini alayon sa May 12 elections.
Kini agi’g paglig-on sa hiniusang kasabutan tali sa Comelec ug CSC aron likayan nga mahimong kasangkapan ang mga opisina sa gobierno ug mga empleyado niini alang sa makuhang pabor sa usa a kandidato ilabina sa local govt units.
Namahayag si CSC 10 Special Investigator III Lady Mae De los Santos Castaños nga dili dautan ang pag-share,like ug pag-komento diha sa social media post apan siguruhon sa mga employed nga mihimo niini nga walay dala nga pagpamulitika aron danihon ang bisan kinsa nga mopabor sa usa ka kandidato o partido sa politika.
Gisugdan kining maong kasabutan sa duha ka buhatan sa gobierno tuig 2015 ug gipalig-on sa bag-ong memo circular sa CSC ning tuiga.
Samtang sa pikas bahin,makahimo’g pagsuporta ang elected officials ug bisan ang job orders ngadto sa gipangpaboran nila nga mga kandidato bisan sa gilugwa nga joint Comelec-CSC memo circular nga nagsita sa mga limitasyon sa taga-gobierno makalambigit sa dayag nga politika sa nasud.
Miingon si Comelec-Misamis Oriental Provincial Election Supervisor Atty Carlito Ravelo nga gitugot ngadto sa maong mga empleyado ang dayag nga pagsuporta sa ilang gidapigan nga mga kandidato apan sa higayon nga wala na sila’y gimbuhaton sulod sa opisina.
Gipasabot niini nga kung nakumpleto na niini ang gimando nga oras ting-trabaho, makahimo na ang maong mga gitumbok nga mga empleyado sa ilang pagsuporta nga walay madamay nga kagamitan sa kagamhanan.
