Nag-isyu sa subpoena ang Department of Justice (DOJ) batok kang Bagong Alyansang Makabayan (Bayan) President Renato Reyes kalabot sa kasong sedisyon human niya gipanguluhan ang lapad nga lihok protesta niadtong Septiyembre 21.
Ang subpoena sa ahensya nagsumikad sa kasong gisang-at ni Lt. Col. Jonathan Estrada sa Philippine National Police subay sa mga dokumento nga gipaambit ni Reyes niadtong Biyernes, Enero 16.
Matod ni Reyes, si Lt. Col. Estrada nisang-at sa sedition, inciting to sedition ug paglapas sa Cybercrime Law batok kaniya kalabot sa kaylap nga mga protesta sa miaging tuig taliwala sa mga nabutyag nga anomaliya sa mga flood control projects.
Apan, gihimakak ni Reyes ang mga pasangil batok kaniya nga tataw nga dili tinuod ug ang sumbong-sedition tumu-tumo lamang.
Sa subpoena sa DOJ, si Reyes gimanduan nga mopatim-aw kagahapon, Enero 15, ug mosumiter sa iyang counter-affidavit sa Enero 26 uban sa mga supporting documents isip kabahin sa preliminary investigation sa iyang kaso.
Ang Bayan Muna, andam usab mukaso’g harrassment batok sa opisyal tungod sa walay unod nga pasangil.
