CAGAYAN DE ORO CITY-Apektado ang halos gatos ka pamilya sa pagdagko sa balod ug kusog nga hapak sa hangin gikan sa pipila ka lungsod ug syudad sa Misamis Oriental.
Kini human nananguba ang daghang kabalayan sa mga residente gikan sa Gingoog City ingon man sa Magsaysay,Medina,Jasaan,Villanueva ug Lugait nga epekto sa presensiya sa bagyong Paulo.
Miingon si Sotsot Dy Jr,head sa PDRRMD sa lalawigan nga hinoon walay mga residente nga naangol o nakalas atol sa kusog nga hangin ug dagkong balod sa kadagatan sa miaging adlaw.
Samtang tunulan sa hinabang-pinansyal ang dul-ag 80 ka pamilya nga apektado sa dautang kahimtang sa panahon sa lungsod sa Villanueva,Misamis Oriental.
Kini human ubay-ubay usab ka pinuy-anan sa mga residente ang giguga sa kusog nga hangin ug dagkong balod sa tulo ka brgy sa maong lungsod.
Gibutyag ni Villanueva MDRRMO head Norman Ricacho nga inisyal nang nahatagan sa relief goods ang mga biktima samtang gi-proseso na ang financial assistance alang kanila.
Sa pikas bahin,nanglupad ang pipila ka commercial billboards ug mga atop sa gambalay dihang naigo usab sa kusog nga hangin ang pipila ka bahin sa syudad.
Gikompirmar ni CDRRMD head Allan Porcadilla nga naigo usab sa natumba nga kahoy ang usa ka motorela gumikan sa dili maayong kahimtang sa panahon.
Dugtong niini,gialerto ni Porcadilla ang katawhan nga dili magpasagad sa ilang seguridad ilabina sa panahon nga adunay mga pag-usab sa panahon.
