CAGAYAN DE ORO CITY – Nakaandam si Bukidnon Provincial Police Office Director Colonel Reynante Reyes kon unsa man ang mahimong resulta sa imbestigasyon batok kaniya nga gihimo sa Kampo Alagar.
Kini human imando ni PRO 10 regional director Brig Gen Lawrence Coop nga susihon ang pasangil nga tig-dawatan sa monthly payout balor 15-mil pesos si Reyes gikan sa 30 hangtod 40 ka pulis nga ubos sa gitawag nga ‘Alive Scheme.’
Namahayag usab si Reyes nga kon mopabor kaniya ang resulta sa imbestigasyon,nagkahulugan kini nga pulos bakak ang akusasyon nga gibahid batok kaniya.
Una nang gihimakak sa maong opisyal nga nangawurta kini ug tig-dawatan sa protection money gikan sa illegal gambling operators sa Bukidnon.
Samtang gihagit ni Coop ang utok sa mga reklamo batok kang Reyes nga maisugon nga mopaila ug magbitbit sa ilang mga ebedensiya.
Kini aron mapatud-an nila ang ilang mga pasangil batok sa top police official sa Bukidnon PNP.
Miingon si Coop nga mas sayon ang pagpasangil apan pag-abot sa pagmatood niini ang lisod kay moagi kini sa makuti nga proseso.
Hisayrang wala una sipa-a ni Coop sa puwesto si Reyes hangtod nga dunay makit-an nga lig-ong basehan sa tanang alegasyon nga gipakang kontra kaniya.
