NANAWAGAN sa kalinaw ug panaghiusa sa tibuok kalibutan ang Filipino-Chinese nga abogado nga si Samon So Tan samtang gisaulog ang Chinese New Year karong tuiga.
Sumala ni Tan, iyang tinguha nga mahunong na ang mga tensyon tali sa dagkong nasud ilabi na ang panagbangi tali sa Estados Unidos ug China, ug mapulihan kini sa kooperasyon ug panaghiusa.
Matod pa niya, mas maayong magkahiusa ang tanang nasud kaysa padayon nga pasudlon ang kalibutan sa kagubot nga nagpalisod sa kinabuhi sa ordinaryong katawhan.
Dugang pa ni Tan, naghinaot usab siya nga mahunong na ang mga dagkong pagbaha ug uban pang kalamidad nga nagpasakit sa daghang komunidad.
Lakip sa iyang New Year wish ang kaayohan sa Pilipinas, ilabi na nga mamata na ang mga tiwaling opisyal sa gobyerno aron makapuyo ang katawhan sa kalinaw, hustisya, ug paghiusa.Matod pa niya, ang tinuod nga kalampusan sa bisan unsang nasud magsugod sa malinawon nga panghunahuna, matinud-anong pagpanguna, ug pagtinabangay sa matag usa. (James Oliver)
