GISUGDAN na sa Office of Trade and Commerce Cagayan de Oro ang public hearing alang sa mga negosyante sa dakbayan nga naggamit sa analog weighing scale o timbangan.
Ang kalihokan gipangulohan sa Trade and Commerce Chairman nga si Christopher George Goking, isip kabahin sa iyang gisugyot nga amendment sa ordinansa sa syudad nga magmandato sa paggamit sa digital nga timbangan.
Sumala ni Goking, tumong sa maong panukala nga malikayan ang pagpanglimbong sa mga konsumidor ug masiguro nga sakto ang sukod sa mga produkto ilabi na sa merkado.
Naghinaot siya nga maaprubahan ang amendment aron mahunong na ang mga reklamo sa mga customer nga mopalit og karne nga kulang sa timbang bisan pa ug sakto kini sa timbangan sa tindahan.
Matod pa ni Goking, ang paggamit sa digital nga timbangan makatabang sa pagpanalipod sa katungod sa mga konsumidor ug sa pagpalig-on sa pagsalig sa transaksiyon sa merkado. (James Oliver)
