Gihagit karon sa grupong ILAW ang mga konsumante nga magmata ug susihon og maayo ang ilang mga bill sa kuryente matag bulan.
Giawhag sa representante sa ILAW ang publiko nga mangutana kon asa gyud paingon ang ginakolekta nga kwarta, dungan sa pagsaway sa nagpabiling bati nga serbisyo taliwala sa taas nga bayranan.
Dugang pa sa grupo, kinahanglang molihok na ang gobyerno ug dili lang pasagdan nga ang mga yanong lungsuranon ang kanunay nga magpas-an sa bug-at nga gastuson.
Gidepensahan usab sa maong pundok ang mga 4Ps beneficiaries ug gipasabot nga dili sila ang angay basulon sa mga “subsidies” o charges nga gipahamtang sa bill. Panapos sa grupo, accountability gikan sa gobyerno ug mga collectors ang gikinahanglan aron masiguro nga tinuod nga serbisyo ang makuha sa katawhan. (jane abulag)
