CAGAYAN DE ORO CITY – Nahatagan sa bag-ong paglaum ang Kagay-anons nga hayan makasakmit sa medalyang bulawan alang sa taliabot nga Paris Olympics didto sa Pransya nga himoon sa Hulyo hangtod Agosto ning tuiga.
Kini human gimantala ni Cagayan de Oro boxing team head coach Elmer Pamisa nga milampos si Tokyo Olympics boxing silver medalist Carlo Paalam pagpukan sa iyang kontra nga Indian boxer nga si Sachin Siwach 2nd World Boxing Olympic Qualification Tournament sa Hua Mak Indoor Stadium sa Bangkok, Thailand.
Matud ni Pamisa nga tungod sa kadaugan ni Paalam,kabahin na kini sa moaway sa Paris Olympics kuyog sila Tokyo silver medalist Nesthy Petecio, Tokyo bronze medalist Eumir Marcial ug laing duha nga pulos first-timers.
Gipukan ni Carlo si Sachin via unanimous decision aron makab-ot ang 5-0 win sa 57 kilograms semi-final match.
Hisayrang si Carlo unta ang unang makatunol sa boxing gold medal alang sa Pilipinas apan gikulang ug nalupig kini sa kalig-on sa boksidor sa Uzbekistan sa miaging Tokyo Olympics sa Japan sa tuig 2020.
