CAGAYAN DE ORO CITY – Gi-alerto ni City Mayor Rolando ‘Klarex’ Uy ang publiko batok sa nagkaylap nga fake news o pekeng mga balita nga igo lang moguba sa dignidad sa usa ka tawo.
Gihimo ni Klarex ang pasidaan nunot sa pagka-biktima na usab niini sa gipakatag nga fake news nga daw nagsilbi siya nga druglord ning syudad.
Miingon ang opisyal nga dili kalikayan ang pipila ka indibidwal nga dunay mga kinaiya nga nangandoy sa ika-alaot sa isig-katawo rason nga mogamit na lang sa wala itugot sa balaod.
Gitumbok sa mayor ang pagsampit sa usa ka social media troll nga midamay sa pangalan ni PDEA Director General Moro Virgilio Lazo diin nagsaysay nga dugay nang natumbok kung kinsa ang druglord sa dakbayan apan lisod kuhaon kay anaa pa sa posisyon ug kasamtangang kapitan ang usa sa mga anak.
Siya miingon nga ayha motoo ang katawhan,angay masayran una kon tinood ba ang impormasyon ug kon kinsa ang nagsulat o nagpakatag niini.
Una nang gitoohan nga troll account lang sa Facebook ang nagpakatag sa malisyosong impormasyon kabahin sa pagkatawo ni Uy,Lazo ug uban pang personalidad nga maligsan sa maong fake news.
