CAGAYAN DE ORO CITY – Dili na manginlabot si City Mayor Rolando ‘Klarex’ Uy kon giunsa paggamit sa Cagayan de Oro City Police Office (COCPO) ang 5 milyones pesos nga monthly city allowance alang sa tanang mga pulis nga nag-serbisyo sa dakbayan.
Kini ang tubag sa tigpamaba sa mayor nga si Janboy Actub kabahin sa isyu nga gikuhaan sa 300 pesos ang 2-mil 500 nga cash incentives nga giingong wala moagi sa ensaktong kooordinasyon sa mga hingtungang mga pulis.
Namahayag si Actub nga gihatag na niya ang maong tabang-pinansyal sa COCPO ubos sa pagpangulo ni City Director Col Salvador Radam rason nga diskarte na niini ang pagpaabot sa iyang mga ginsakupan.
Siya miingon nga bugtong tahas sa mayor nga mapun-an ang allowances nga dawaton sa mga pulis aron madasig sila’g trabaho ug makahatag sa ensaktong seguridad alang sa katawhan sa dakbayan.
Pagpasabot ni Actub nga kon may isyu man kabahin sa pagkaltas,mismo na si Radam ang makahimo’g pag-esplikar niini ngadto sa mga nag-reklamo ngadto sa media.
Gipasabot kaniadto ni Mayor Klarex nga 2-mil 500 niini gift certificate samtang laing katunga cash aron magamit sa mga pulis sa ilang mga pamilya.
Apan nakurat ang pipila ka pulis kay P4,700 na lang ang tanan kay gikuha ang 300 pesos kay unang nabaniug nga gamiton alang sa training nilang mga pulis.
Sa pag-interbyu ug pagtin-aw ni Radam,namahayag kini nga kompirmado ang kaltas apan gamiton daw kini ngadto sa ubang mga pulis nga nakabalik-serbisyo na sa COCPO gikan sa schooling.
Namugos usab kini nga kon buot huna-hunaon,kulang pa ang P5-M monthly allowance nga gihatag sa city govt aron iguan sa libo ka pulis nga anaa sa COCPO.
Nangugat si Radam nga tanan sila gikuhaan sa tag-300 pesos ug dili lang ang mga kauban niyang mga pulis tungod sa maong katuyuan.
