CAGAYAN DE ORO CITY – Nangayo’g hustisya ang pamilya sa biktima sa giingong peke nga home-service chiropractic provider ning syudad.
Kini human namatay na ang nagsilbing biktima nga si Leobert Mangubat Yurong,minyo nga taga-Zayas,Brgy Carmen ning syudad kay nag-grabe ang naangkon niya nga bali sa paa sa miaging tuig.
Nag-viral ang kaugalingong video sa biktima dihang gi-post niya kini sa social media sa tuyo nga tabangan unta siya sa chiropractor sa galastuhan sulod sa ospital tungod sa damyos niini.
Apan kutob lang sa pasalig ang maong suspek ug wala na kini nagpakita pa nga giingong naggikan sa sa Zamboanga Peninsula.
Una nang gikompirmar sa ospital diin siya nadala nga nagbaton sa prakyur ang paa niini ug angay unta butanga’g stainless steel plates.
Kini ang rason nga gipaninggit sa pamilya sa biktima ang dinaliang hustisya sa sakit nga panghitabo.
