Bisan pa man sa krisis sa petrolyo ug kainit sa panahon, aktibo gihapon sa pag‑Visita Iglesia ang mga deboto karong Semana Santa.
Sumala ni Fr. Der John Faborada, spokesperson sa Social Apostolate sa Archdiocese of Cagayan de Oro, dagsa gihapon ang mga magtutuo sa pagtambong sa simbahan ilabi na kagahapon sa Huwebes Santo aron masaksihan ang washing of the feet, nga simbolo sa pagpaubos ug pag‑alagad ni Hesus sa iyang mga disipulo.
Dugang pa niya, human sa misa, gitambungan usab sa mga deboto ang pagbutang sa Blessed Sacrament sa altar of repose diin gidasig ang katawhan nga magpadayon sa pag‑ampo ug pagbisita sa night vigil.
Gipasabot usab ni Faborada nga ang Visita Iglesia usa ka importante nga tradisyon nga nagpalalom sa pagtuo ug pagpamalandong sa sakripisyo ni Kristo, rason nga gitambungan gayud kini sa mga deboto bisan pa sa mga kasikas sa panahon.
Sa katapusan, giingon ni Faborada nga ang padayon nga partisipasyon sa mga deboto nagpakita sa lig‑on nga pagtuo bisan pa sa mga hagit nga giatubang karong panahona.
