CAGAYAN DE ORO CITY – Nasikop sa kapolisan ang pulis tungod sa pagkupot sa illegal nga armas ug granado sa usa ka puluy-anan sa Brgy Iponan ning syudad karong hapon lamang.
Giila ang suspek nga si Police Staff Sargeant Armand Tagolimot alyas ArTags kinsa dugay nang nagsilbing absent without leave o AWOL sa serbisyo.
Giakusahan usab si Tagolimot nga usa sa mga suspek nga mipusil-patay kang Cogon Police Station commander Capt Abulcahar Armama dihang mipauli na kini sa iyang pinuy-anan sa Brgy Bulua ning syudad niadtong Oktobre 5,2024 sa gabii.
Apan gihimakak ni Tagolimot ang mga pasangil batok kaniya.
Namugos kini nga mugna-mugna lang ang mga ebedensiya nga nakuha sa raiding team gikan kaniya.
Dumduman nga si Tagolimot, pinangita usab sa Philippine Drug Enforcement Agency 10 tungod sa pasangil nga nalambigit usab kini sa pagpayuhot sa gidiling droga diin siya nahimong target sa usa ka operasyon sa Tagoloan,Misamis Oriental sa miaging Agosto 3,2024.
