CAGAYAN DE ORO CITY – Giaghat sa kapolisan kadtong mga pamilya nga nawad-an sa sakop sa pila na ka adlaw kay dunay nakit-an sa mga mananagat nga patay’ng lalaki nga naglutaw-lutaw sa utlanang bahin sa kadagatan sa lungsod sa Tagoloan ug Jasaan sa Misamis Oriental.
Miingon si Tagoloan Police Station commander Capt. Ralph Rexson Layug nga ang maong patay’ng lawas anaa kasamtangang gihimutang sa punerarya sa lungsod aron dali makuha sa tagtungod niini.
Siya miingon nga naka-sul-ob sa kolor brown nga shortpants ug walay sinena ang maong biktima diin dunay gamay’ng samad sa kilay nga bahin niini dihang gihaw-as padulong sa lapyahan sa Barangay Baluarte.
Dugang ni Layug nga angayang ipaubos sa otopsiya ang biktima aron masuta kon may foul play ang kamatayon niini.
Gikompirmar usab niini nga dili taga-Tagoloan ang maong biktima kay walay nakaila rason nga giaghat ang mga tagtungod nga duawon ang kapolisan aron magiyahan.
