CAGAYAN DE ORO CITY – Wala pa’y makasuhan ang kapolisan kabahin sa dugu-ong aksidente sa ambulansiya nga gikan Pagadian City padulong Cagayan de Oro City kay adunay gihatod nga pasyente kay ipaubos sa operasyon.
Kini bisan nadisgrasya ang ambulansya nga gimaneho ni Joel Ticbao kay nawad-an sa preno pag-abot sa digyas nga kalsada sa Purok 7,Brgy Dableston,Sultan Naga Dimaporo,Lanao del Norte rason nga namatay ang attending nurse nga si Jasper Alcara ug upat ang samaron.
Miingon si Police Regional Office 10 spokesperson Major Joann Navarro nga dili pa prioridad sa pamilya sa namatyan nga taga-Pagadian City ang aksyong-legal ug pulos pa usab nagpalagsik sulod sa ospital ang mga naangol sa hitabo.
Una nang gi-refer sa Mendoro Hospital ang pasyente nga si Christopher Galemit sa Polymedic Plaza ning syudad aron operahan apan nahulog sa pangpang ang ambulansiya.
Apil nga mga kritikal ang kuyog sa pasyente nga sila Lord Cedrick Malinao ug Kris Alyssa Galemit nga pulos taga-Pagadian City dihang nadisgrasya sa Domingo sa hapon.(Mga hulagway gikan Navarro Mike).
