CAGAYAN DE ORO CITY – Gi-kuwestiyon sa konseho ang walay koordinasyon ug igong pagtugot nga pagpabuga sa nagdumala sa City Central School sa pipila ka pader kay gitukura’g laing ‘gate’ diha sa Yacapin-Velez Streets ning syudad.
Kini human nakaabot sa konseho ug maoy gibasehan ni Kag. Malvern Esparcia sa iyang special report ang Facebook post ni Oro historian Rai Bollozos Sanchez ang ka-dismaya kon nganong gibaylo sa pagtugot sa ‘gate’ ang 70 anyos na nga mga kural sa maong tunghaan.
Miingon si Esparcia nga tataw nga wala hatagi’g bili sa nagdumala sa maong tunghaan ang importansya sa balaod sa Republic Act no. 10066 o mas naila nga National Cultural Heritage Act sa nasud.
Samtang giaghat usab ni Kag. James Judith ang Oro historians nga naglakip kang Rai Bollozos Sanchez nga mohimo’g imbentaryo sa mga antigo ug ubang karaang mga butang pabiling nagbarog ug makit-an dinhi sa dakbayan.
Kini aron mahimuan nila sa tukmang aksyon pinaagi sa pagpasar sa mga balaod nga dili basta-basta panggub-on tungod lang sa pagka-ignorante sa pipila ka nagdumala sa mga buhatan sa gobierno.
Reaksyon usab kini ni Judith tungod sa reklamo sa pipila ka Oro historians nga naglakip kang Sanchez sa nahitabo sa pipila ka kural sa 1916 built nga City Central School.
Samtang gisugyot usab sa historian ug arceoglist nga si Nanette Roa nga gilayong mohimo’g aksyon ang City Historical Commission kabahin sa nahitabo sa City Central School ning syudad.
Kini tungod kay kabahin sa ilang trabaho ang pag-preserbar sa mga kabtangan nga nagtangag sa kasaysayan kon unsa kaniadto ang kahimtang sa unang Cagayan de Oro.
Miingon si Roa nga sama sa ubang Oro historians,gibati usab niini ang pagkadismaya kay walay paghatag sa bili ang mga nagdumala sa maong tunghaan kon unsa may angay ampingan ug e-preserbar nga kabtangan nga kabilin sa unang Cagay-anons.
Una usab niini,gidalikyatan sa Bombo Radyo ang opisina sa kadagkuan sa maong tunghaan apan nagtambong sa school graduation sa kabataan kagahapong adlawa.
Nasayran nga gihimo ang gate tungod kay aron daw masulbad ang ka-trapik sa maong tunghaan panahon sa ting-klase sa kabataan.
