Hustisya! ug katin-awan ang syagit karon sa nagsubo nga inahan nga si Rovelyn Baterbonia human malunod ug mamatay ang iyang 19-anyos nga anak ug bag-ong basketball player sa Ateneo de Manila University nga si Rene Baterbonia atol sa usa ka team-building activity didto sa Aurora.
Taliwala sa pagbuhagay sa iyang mga luha atubangan ni Agusan del Sur Governor Santiago Cane Jr., gibutyag sa inahan nga todo ang iyang suporta sa sports sa iyang anak sukad pa sa pagkabata sa panghinaot nga kini ang makahaw-as kanila sa kawad-on.
Si Rene nailang Most Valuable Player (MVP) nga dako og natabang sa Davao Eagles aron makuha ang kampyonato sa 2025 Palarong Pambansa, ug bag-o lang usab nakasungkit og silver medal sa iyang mismong yutang natawhan ning tuiga.
Gisaway sa inahan ang kakuwang sa orientasyon sa tunghaan bahin sa maong aktibidad kay kung nasayran pa lang niya ang kakuyaw, bisan magkalisod pa sila, dili gyud niya itugot nga mapahamak ang iyang anak.
Samtang mipasalig ang probinsya sa pagtabang sa pamilya, ipailawom sa autopsy ang lawas sa biktima sa hangyo sa ginikanan dungan sa gihimong imbestigasyon sa unibersidad aron masuta ang tiunay nga kamatuoran luyo sa trahedya. (jane abulag)
