CAGAYAN DE ORO CITY- Gi-awhag sa PNP-10 ang mga pulis nga dili magpalupig sa mga rebeldeng New Peoples Army o NPA.
Matud ni PNP regional spokesperson Supt Lemuel Gonda nga kinahanglang makigpatay ang mga pulis sa mga rebelde kun ugaling atakehon ang ilang police station.
Gani, nagbahad si Gonda nga ilang kasuhan ang mga pulis nga mag-surrender sa ilang mga armas ngadto na sa mga armadong grupo.
Hisayran nga sunod-sunod ang gihimong pagpang-ambush sa mga rebeldeng NPA sa mga pulis sa Talakag, Bukidnon.
Nunot niini, gibutyag sa PNP-10 spokesperson nga nakaalerto ning panahona ang intelligence community sa kapulisan ug kasundaluhan.
Kini sa tumong nga ma-encounter ang sunod sunod nga pagpangatake sa mga rebeldeng New People’s Army sa kabukiran.
Si Gonda miingon nga kanunay gatagbo ang mga naglangkob sa Joint Security Coordinating Center aron monitoron ang lihok sa mga walhong pundok.
