CAGAYAN DE ORO CITY – Dili maka-eskapo sa kasong administratibo ang pulis nga naglasong ug nangulata sa mga sibilyan sulod sa restobar diha sa Upper Carmen sa syudad.
Kini bisan kon misibog ang upat ka sibilyan nga biktima sa paglasong ni Police Capt Calvin Nario Placer nga gikan sa Butuan City Police Office kay nasuko human balibari sa babaye nga iyang gi-interesan sa miaging kadlawon.
Miingon si Carmen Police Station commander Maj Jelesis Teves nga bug-at ang pasangil batok Placer hinungdang mamiligro gihapon ang iyang pagka-pulis.
Hisayrang ipadayon sa PNP ang pagkaso’g administratibo kang Placer ilabina nga nakuhaan kini sa CCTV camera dihang naglasong ug nangulata sa mga sibilyan sa miaging kadlawon sa Pebrero 15 ning tuiga.
