CAGAYAN DE ORO CITY – Nakaduso na sa ilang courtesy resignation si Police Regional Office 10 Director Brig Gen Lawrence Coop kuyog ang laing 18 ka full plede colonels nga ubos sa 3rd level ranks sulod sa PNP.
Kini pagsanong sa apelar ni Chief PNP Gen Rodolfo Azurin Jr nga gi-anunsyo usab ni DILG Secretary Benjamin Abalos Jr kay aron limpyuhan ang ilang organisasyon batok sa pipila ka police officers nga direktang nalambigit sa ilegal nga droga sa nasud.
Miingon si Coop nga pangunayan nila ang paghatod sa ilang pirmado nga resignation ngadto sa buhatan ni Azurin sa Camp Crame ning adlawa.
Siya miingon nga higayon kini aron pamatud-an sa PRO 10 nga wala nagsumikad sa Northern Mindanao ang gitumbok ni Azurin ug Abalos nga pipila ka tag-as nila’g ranggo nga mga pulis nga namaligya’g drogas.
Samtang wala itago ni Coop nga gibating kabalaka nga hayan maka-apektar sa morale sa ilang mga kauban ang daw pagpapha kanila sa serbisyo.
Kini ilabina nga daghan ang nadamay sa maong hangyo sa PNP ug DILG bisan kon pipila lang sa ilang mga kaubang rangguhan ang gitumbok nga anaa sa illegal drug syndicate operations.
Gihinaut sa heneral nga unta molampos ang PRO 10 nga walay bisan usa kanila ang matumbok sa five-man panel committte nga anaa sa kalihukang ilegal drug distributions o protections sa mga sindikato.
