CAGAYAN DE ORO CITY- Dili angay sudlan ni Misamis Oriental Gov Bambi Emano ang syudad kay walay siyay klaro nga plata-porma sa gobierno.
Kini ang reaksyon ni City Mayor Oscar Moreno sa report nga mosulod sa syudad si Emano paghupas sa iyang pagka-gobernador sa tuig 2022.
Miingon si Moreno nga managsama lamang sila si Emano ug kanhi Dept of Agriculture Undersecretary Jose Gabriel Pompee La Viña nga mohimo’g pagpangdaot sa iyang mga programa ug proyekto.
Apan, gitin-aw niini nga isalig na lamang ni Moreno sa katawhan ang pagpili kon kinsa ang angayang himoong lider sa syudad.
Samtang, gikataw-an lamang sa kampo ni Emano ang daw panaghap ni Moreno.
Miiingon si Misamis Oriental Provincial Information Office head Carlo Dugaduga nga tinood nga wala maapil sa programa ni Emano ang kurapsyon itandi kang Moreno kinsa nag-atubang sa daghang kaso sa Sandiganbayan.
Gipamugos usab ni La Viña nga may tin-aw siyang plataporma sukwahi sa batikos kaniya ni Moreno.
Miingon si La Viña nga kon buligan siya sa katawhan sa syudad maoy iyang prayoridad nga tutukan ang agrikultura ug turismo.
Si Laviña ang gipildi ni Moreno dihang nagka-kontra sila pagka-mayor sa miaging May 2019 elections sa syudad.
Hisayrang gusto ni Gingoog City Vice Mayor Peter Unabia nga pilian si La Viña ug Emano nga ipadagan pagka-mayor batok sa giindorso ni Moreno nga si Cagayan de Oro 1st District Cong Rolando Klarex Uy sa syudad.
