
Subli gipabati sa Russia ang padayong pagpakusog sa ilang kapas-militar sa Asya pinaagi sa pagdeploy sa duha ka Tu-95 strategic bombers ug mga support aircraft sa Vietnam.
Subay sa report, kini na ang labing dakong operasyon sa Moscow Government nga gilusad sa East Asia sulod sa kapin usa ka dekada.
Ang mga eroplano nakapukaw sa pagmatngon sa air forces sa Taiwan ug Japan human kini makita nga milupad gikan sa Russian Far East ug duol sa ilang mga lugar sa depensa.
Gituohang gihimo ang deployment sa wala pa ang mga importanteng panagtigom sa mga lider sa APEC ug ASEAN, lakip ang pag-abot ni Russian President Vladimir Putin sa Shenzhen, China.
Sumala sa security analyst nga si Ian Storey, ang lakang usa ka mensahe nga bisan pa sa gubat sa Ukraine, makahimo gihapon ang Moscow sa pagpalapad sa iyang impluwensiya ug presensya militar sa Southeast Asia.
Ang deployment mao ang unang nailhang dakong presensya sa Russian strategic bombers sa Vietnam sukad 2014 ug nagpasabot sa padayon nga interes sa Russia sa rehiyon. –






