CAGAYAN DE ORO CITY – Gawasnon na ang sundalo nga nakabangga-patay sa duha ka sibilyan sa Zone 2,Brgy Población,Laguindingan, Misamis Oriental.
Gibutyag ni Police Corporal Sammy Jabutay, traffic investigator sa Laguindingan Police Station nga maoy namatay sa dugu-ong aksidente sila Danilo Taping ug Anecita Taping nga magkabanay.
Subay sa imbestigasyon,nakahunat na’g dagan ang multicab nga gimaneho ni Danilo ug paliko na unta kini sa walang bahin sa highway hinungdang nabanggan sa army truck nga gimaneho ni Army Cpl Revvas Elvis Dandan.
Nag-resulta kini sa grabeng pagka-angol ni Danilo rason dead on arrival nahidangat sa Alubijid-OWWA Hospital samtang nakabsan usab sa kinabuhi pipila ka oras nga pagdala sa Northern Mindanao Medical Center si Anecita.
Sulti ni Jabutay nga nagkauyon ang panig sa mga sundalo ug kabanay sa mga namatyan nga wala na’y kaso kay gitubag na niini ang pag-atiman ug galastuhan sa mga ospital.
Gawas sa mga namatay, samaron apan dili grabe ang laing mga sibilyan nga naglakip kanila ni Maricel Taping Baculio,Teresita Taping Garcia,Christine Anne Taping Baculio ug 8-months old nga nagpuyo sa Brgy Gusa ning syudad samtang si Danilo nagpuyo sa Zone 4,Poblacion,El Salvador City.
Dugang sa report nga gikan sa lungsod sa Alubijid ang mga biktima samtang ang mga sundalo kabahin sa convoy nga nagsumikad pa sa Zamboanga Peninsula padulong sa Cagayan de Oro sa dihang nadisgrsaya.
Hinoon,wala maunsa si Dandan ingon man ang iyang mga kauban nga sila Private First Class Normilito Bantisel;Jerome Valesera IV ug Chris John Libre taliwala sa kakusog sa impact bangga kagahapon sa udto.
