CAGAYAN DE ORO CITY – Mapun-an pa ang mag-atubang sa kasong murder nunot sa kamatayon ni late Mr Cagayan de Oro Adrianne Rovic Fornillos nga taga-Brgy Lapasan nga sobra duha ka tuig nang namatay ning syudad.
Kini human kompirmaha sa abogado sa pamilyang Fornillos nga si Atty Dale Bryan Mordeno nga nagpatim-aw na kanila ang nagsilbing middleman nga giingong gitahasan ni detained Pastor Demver Andales aron mangita’g gun for hire aron patyon ang biktima niadtong Mayo 2023 sa Brgy Nazareth ning syudad.
Miingon si Moderno nga dako kini nga kalambuan sa murder case nga ilang gipasaka batok sa detinado nga si Andales ug laing pastor kabahin sa kremin.
Siya miingon nga dili lang si Andales ang ma-implikar sa kamatayon niini apan adunay pipila ka dagkong opisyal pa ang apil sa makasuhan nunot sa pagtunga sa giingong iyang contact sa pagpahimo sa kremin.
Gani,gisaysay sa nagpailang gisugo ni Andales nga anaa sa 100-mil pesos ang gitanyag niini aron mokuha sa gun for hire alang sa pag-likidar kang Fornillos.
Misaysay pa usab kini nga gipatoo kanila ni Andales nga ipapatay si Forrnillos kay giingong ka-relasyon sa iyang kapikas hinungdang makapila sila kahigayon nagkita aron sabutan ang paghimo sa kremin.
Dumduman nga unang nanulti ang kapolisan nga ‘crime of passion’ ang kamatayon sa biktima kay giingong ka-relasyon ni Andales ang babaye nga hinigugma niini.
Si Andales ang kasamtangang detinado sa Lumbia City Jail tungod sa kasong murder kay boluntaryo nga mi-surrender apan kusganong gihimakak ang kremin.
Sa pagkutlo ning balita, wala pa’y gihatag nga reaksyon ang pamilya ni Andales.
