CAGAYAN DE ORO CITY – Gikonsiderar sa kapolisan nga tipik sa mga suspek ang napatay sa kapolisan nga armadong lalaki pipila ka minutos gikan sa pagka-ambush sa convoy ni incumbent Provincial Gov. Mamintal ‘Bombit’ Adiong Jr sa Maguing,Lanao del Sur.
Kini human gilayong mihimo sa pursuit operation ang kapolisan ug militar batok sa grupo nga mibanhig kang Adiong nga nagresulta sa kamatayon sa iyang upat ka security escorts sa miaging adlaw’ng Biyernes.
Miingon si PNP chief Gen. Rodolfo Azurin Jr nga giila lamang una ang suspek nga si alyas ‘Tino’ samtang dugang siyam pa ang pabiling giggukod sa SITG-Adiong.
Siya miingon nga pagmatood lamang kini nga wala magpasagad ang PNP batok sa mga tawo nga mohimo’g kremin.
Una nang giangkon sa PNP nga dunay pagkompiskar sa minilyong balor sa drogang marijuana sa lungsod sa Maguing sa buntag nga bahin sa miaging Biyernes ug pagkahapon,gi-ambush si Adiong apan luwas ra kay dili grabe ang igo sa tiyan niini.
