Gimandoan ni Vince Dizon, kalihim sa Department of Public Works and Highways, nga unahon ug tapuson ang mga nahiling proyekto sa imprastraktura sa dili pa magsugod og bag-ong mga proyekto. Sumala ni Dizon, kinahanglan paspasan ang pagpatuman sa mga natanggong proyekto aron masiguro nga husto ug episyente ang paggamit sa pondo sa gobyerno. Gipahimangnoan usab niya ang mga regional ug district offices sa DPWH nga paspason ang konstruksyon ug sulbaron dayon ang mga isyu nga maoy hinungdan sa kalangan. Tumong sa maong direktiba nga malikayan ang pagdagsa sa mga proyekto nga dili mahuman ug aron mas dali mabati sa publiko ang benepisyo sa mga proyekto sa imprastraktura. (Phillip Ariata)
