CAGAYAN DE ORO CITY – Naka-hospital arrest ang truck driver nga nakabangga sa passenger van nga nag-resulta sa kamatayon sa tulo ka tawo sa Sitio Bulotano,Brgy Lantay,Pangantucan,Bukidnon.
Kini samtang gihikay sa Pangantucan Police Station ang mga kaso nga posibleng ipasaka batok sa drayber nga si Bryan Benachay nga Brgy Adtuyon sa maong lungsod.
Miingon si Police Regional Office 10 spokesperson Major Joann Navarro nga sa higayon nga makagawas na sa ospital ang suspek,gilayon kining isulod sa min-cell samtang gihikay ang paghandos sa mga kaso sa piskalya nunot sa hitabo.
Dumduman nga nawad-an sa preno ang trak nga kargado sa mga pinutol nga tubo samtang paglugsong kini sa Maramag padulong sa Kalilangan hinungdan nga nasungag ang van ug mi-resulta sa kamatayon sa mga biktima.
Kabahin sa mga namatay ang mismong van driver nga si Argon Bangit, Sonia Bangit nga nahulog pa sa sapa ug menor de edad nga babaye.
