CAGAYAN DE ORO CITY-Gibasol karon ni kanhi City Mayor Vicente ‘Dongkoy’ Emano si incumbent City Mayor Oscar Moreno kon nganong wala mapugngi ang pagpirma sa sa bag-ong kontrata sa panubig tali sa Cagayan de Oro Water District o COWD ug Metro Pacific Water Investments Corporation sa syudad.
Gikontra ni Emano ang pahayag ni Moreno nga walay labot ang syudad sa gisudlan sa COWD ug MetroPac nga kasabutan.
Nagtoo si Emano nga ipasa sa COWD sa katawhan ang taas nga presyo sa tubig nga ibaligya kanilan gikan sa MetroPac.
Namugos usab si Moreno nga nagsugod ang problema sa panubig sa syudad mismo sa panahon ni Emano.Giangkon ni Moreno nga giimbitar siya sa pinirmahay sa kontrata sa COWD ug MetroPac apan isip nagsaksi lamang sa maong transaction.
Gibutyag ni Moreno nga angay dumdumon ni Emano nga sa ilang panahon nakasulod ang Rio Verde Water Consortiom nga direktang gikuhaa’g tubig sa COWD aron i-suplay sa katawhan sa syudad.
Kasamtangan pa gihapong nagka-problema ang suplay sa tubig sa Rio Verde hinungdan nga kapin libo pa ka konsumante sa syudad ang walay klarong serbisyo ning panahona.
