Gibutyag ni DILG Secretary Jonvic Remulla nga wala pa siya makadawat sa opisyal nga impormasyon bahin sa giingong arrest warrant batok kang Senador Ronald “Bato” Dela Rosa nga giisyu sa International Criminal Court (ICC).
Kini iyang tubag human misulod ang report kagahapong Sabado, Mayo 9, nga aduna daw warrant nga gipagawas sa international tribunal, apan giingon sa kalihim nga hangtod wala pa niya makita ang opisyal nga kopya, busa “hearsay” pa kini.
Gipahibalo usab ni Remulla nga andam na ang DILG sa pagdeploy sa 10,000 ka task force alang sa dragnet operations kon ipagawas gayud ang warrant.
Sa laing bahin, giklaro ni ICC spokesperson Oriane Maillet nga wala pa’y gipagawas nga public arrest warrant ang korte nga may kalabotan sa Pilipinas, bisan pa sa mga report nga nag-angkon nga si Dela Rosa nag-atubang sa kaso nga may kalabotan sa drug war sa administrasyon ni kanhing Presidente Rodrigo Duterte. (phillip ariata)
