CAGAYAN DE ORO CITY – Walay pagduha-duha nga moduso sa iyang courtesy resignation si Police Regional Office 10 Brigadier General Lawrence Coop agi’g pagsanong sa hangyo ni DILG Secretary Benjamin Abalos Jr.
Kini ang paagi ni Coop aron mapakita sa publiko nga wala siya’y gitago nunot sa pagkadismaya ni Abalos sa ngadto sa ubang mga pulis nga nalambigit sa illegal drug trade sa nasud.
Gibutyag ni PRO 10 spokesperson Police Maj. Joann Navarro nga suportado sa Camp Alagar ang maong lakang kon kini ang bugtong paagi aron mapalig-on ang internal cleansing sulod sa PNP batok sa scalawag members niini.
Ubos sa PRO 10,dunay duha ka ranking generals ug 19 ka police colonels diin lima niini nagsilbing provincial directors ug laing duha city police director nga naglakip dinhi sa syudad ug Iligan City.
Samtang pagpihig sa PNP ang gisulti ni Abalos Jr nga ipaduso’g ‘courtesy resignation’ ang mga pulis nga dunay ranggo nga full pledge colonels ug generals.
Kini tungod lamang kay dunay pipila ka pulis nga aktibong nalambigit sa pagbaligya’g ilegal nga droga ug pagsilbing protector sa druglords dinhi sa nasud.
Miingon si Atty.Antonio Soriano,convenor sa Citizens Watch for Good Governance 10 nga wala lang mo-sentro sa pipila ka rangguhang pulis ang pagkaylap sa ilegal nga droga apan bisan sa pipila ka ultimo nga personahe sa PNP.
Samtang namugos usab si Navarro nga ang gihimo ni Abalos ang labing dali nga paagi aron paspas malimpyuhan ang PNP batok sa nagkadaiyang kahiwian nga hinimuan sa pipila sa ilang mga kauban.
