CAGAYAN DE ORO CITY-Hangyoon ni Ozamiz City Police Office commander C/Insp Jovie Espenido si PNP chief Director General Oscar Albayalde nga siya ang mohupot sa kaso sa most wanted person nga si Ozamiz City Councilor Ricardo ‘Ardot’ Parojinog nga unang nadakpan sa Taiwan sa miaging semana.
Si Espenido miingon nga gusto niya nga kumpirmahon gikan mismo kang Ardot ang mga gibulgar nga impormasyon sa iyang mga sakop nga una na niyang nadakpan.
Gipanganti niini nga daghang mga rebelasyon ang moggawas nga ikakurat sa tanan ug daghang mga pulis nga protector ang makasuhan kon siya ang mohupot sa kaso.
Gibutyag usab ni Espenido nga mopauli na siya sa Leyte kun ugaling balibaran sa PNP chief ang iyang hangyo.
Siya miingon nga nahuman na ang iyang misyon base sa kamanduan ni Pres Rodrigo Duterte nga dakpon ang napatay’ng si City Mayor Reynaldo “Aldong” Parojinog Sr., Vice Mayor Nova Princess Parojinog ug Ozamiz City Councilor Ricardo ‘Ardot’ Parojinog nga unang gitumbok nga maoy utok sa illegal drugs distribution sa Mindanao.
Una nang gikompirmar ni Espenido nga ila nang gihuptan ang Parojinog Drug Syndicate Group nga magpamatood nga adunay mobile laboratory sa shabu ang Ozamiz City.
