CAGAYAN DE ORO CITY – Padayong gihimakak ni Bureau of Corrections, Corrections Officer 3 Veronica Buño ang pasangil ni Yolanda Camelon nga siya nangilkil sa P50,000 aron paspas nga makagawas ang bana ni Camelon nga si Godfrey Gamboa sa New Bilibid Prison (NBP).
Sa pagpatim-aw ni Camelon sa ika-unom nga adlaw sa hearing sa kontrobersal nga GCTA Law sa senado, gibutyag ni Camelon nga daghang mga opisyal sa BuCor ang nangayo kaniya’g salapi lakip na si Corrections Officer 3 Veronica Buño.
Gihimakak ni Buño ang akusasyon ni Camelon ug mitug-an nga wala sila sukad nagkahinabiay sa maong ginang.
Apan namugos ang ginang nga maoy magpamatuod sa iyang testamento ang ilang binayluay sa text messages ug mga tawag.
Gumikan niini, napugos ang Senate Blue Ribbon Committee nga ipakompiskar sa seargent at arms ang cellphone ni Buño.
Sa pagturnover, nadiskobrehan sa mga eksperto nga gikinahanglan pa nilang buksan ang cellphone ni Buño kay nagbaton kinig sa password.
Mikuha pag court order ang senado aron mupirma si Buño ug ihatag ang iyang password.
Gipirmahan sa Corrections Officer 3 ang court order nga dala ni Atty Krisha Amores, karong buntag.
Sa tinguha nga dunay mulugwa nga impormasyon, pulos nagpakahilom si Buño sa mga pangutana kaniya ni Sen Richard Gordon ug Franklin Drilon.
Nagdumili pagbutyag si Buño kung tinood ang pasangil ni Camelon ug mihangyo kini nga makighinabi sa usa ka abogado.
Hisayran nga nahimong kataw-anan ni Buño human gibulgar ni NBI Director Dante Gierran ang “exchange of messages” ni Buño ug Camelon base sa ilang gihimong imbestigasyon.
