CAGAYAN DE ORO CITY – Naka-uli na sa ilang pinuy-anan ang 15 sa 60 ka menor de edad nga unang gi-recruit sa Maranao looking suspect nga nakabase sa Brgy. Iponan ning syudad.
Sa exclusive interview sa Bombo Radyo, mitug-ang ang 14 anyos nga batan-on nga si alyas “Loloy” nga gipauban sila sa usa ka alyas Balo alang sa libre nga laag sa Iligan City apan milahos kini sa Butig ug Marawi City aron didto magparehistro.
Mi-angkon si Loloy nga nangurog siya sa pagkakita sa voters registration form pag-abot nila sa sulod sa usa ka hotel sa Marawi tungod kay dili ilang ngalan ang nakasulat ug igo lang sila gipapirma ug gipabutangan sa ilang thumb mark.
Naabtan sa duha ka adlaw ang ilang biyahe ug gipakatulog pa sila sulod sa mosque ayha gipapauli sa ilang puy-anan, sakay ang usa ka Toyota High Ace.
Sa ilang pagpauli,gihatagan silang tanan ni alyas Balo sa tag Php300.
