CAGAYAN DE ORO CITY – Milusad na sa hot pursuit operation ang mga operatiba sa Lala Municipal Police Station sa mga responsable sa duha ka managlahing pagpangluthang sa Lanao del Norte kagabii.
Giila ni Police Master Sargeant Joemel Viadnes ang unang biktima nga napusilan nga si Jundil Dahunan, 24 anyos, ulitawo ug residente sa Molave Zamboanga del Sur.
Nahitabo ang pagpusil sa biktima alas 7:40 sa gabii sa ilang balay sa Purok 1, Brgy. Abaga sa Lala.
Wala pay lead ang mga pulis sa motibo sa insidente.
Samtang, patay nang nadala sa Kapatagan Provincial Hospital ang usa ka senior citizen nga gipusil sa mismong tugkaran sa ilang panimalay sa Purok Balayong, Maranding sa Lala kagabii.
Giila ni Police Major Alan Banas, hepe sa Lala MPS ang biktima nga si Patrocino Dahunos, 64 anyos.
Nakahiagom kini sa igo pinusilan sa nawong nga gitoohang maoy hinungdan sa iyang hinanaling kamatayon.
Narekober sa Scene of the Crime Operatives ang slug sa kalibre 45 nga armas sa crime scene.
Base sa pamahayag sa testigo, gidul-it pagpusil sa suspek ang cal.45 pistol ug paspas nga misibat sakay sa usa ka motor.
Blangko pa ang motibo sa krimen.
