CAGAYAN DE ORO CITY – Kalambigitan sa giingong ilegal nga droga kon nganong gipatay sulod mismo sa pinuy-anan ang pulis ug sibilyan sa Purok 6-B, Brgy. Santiago, Iligan City.
Kini ang gibutyag sa Bombo Radyo ni Iligan City Police Office Station 1 commander Maj Rixell Torayno sa ngilngig nga kamatayon ni Corporal Samuel Banuelos,42 anyos ug Samuel Sanchez,43 anyos nga pulos nagpuyo sa maong lugar.
Miingon si Toryano nga subay sa intelligence report,anaa sa illegal drug watchlist sa PDEA-10 ug PNP hinungdang gipang-patay ang mga biktima gumikan niini.
Na-trauma usab ang kapikas ug anak-babaye ni Banuelos kay nasaksihan nila ang ngilngig nga kremin sa miaging gabii.
Samtang gihagit ni Lanao del Sur Provincial Police director Col Madzgani Mukaram ang Iligan City Police Office Station 1 nga pamatud-an ang akusasyon nga nalambigit sa illegal nga druga si Police Corporal Samuel Banuelos hinungdan nga gipatay.
Gikadismaya ni Mukaram ang alegasyon nga anaa sa drug watchlist si Banuelos kinsa na-assign sa Sagiaran Police Station sa Lanao del Sur.
Miingon ang opisyal nga iyang nahinabi ang kapikas ni Banuelos ug nailhan niini ang usa sa mga suspetsado.
Gani, nagtoo ang pamilya sa biktima nga may kalabutan sa ilang gikasuha’g estafa ang hinungdan sa pagpamusil.
Dugtong niini,mohimo sila’g kaugalingong imbestigasyon aron mahibal-an ang tinood nga motibo sa krimen.
