CAGAYAN DE ORO CITY – Gihagit ni Police Regional Office o PRO-10 Director Brig. Gen. Rolando Anduyan ang mga rebeldeng New Peoples Army o NPA nga makig-atubang kanila kon gusto nila’g tinud-anay nga giyera.
Kini human tawga’g traydor ni Anduyan ang mga rebelde dihang gi-ambush ang convoy ni Eastern Mindanao Command-Directorate for Integrated Police Operations deputy director Police Brigadier General Joselito Salido nga igo lamang miagi sa Sitio KM 26, Brgy Tikalaan, Talakag,Bukidnon.
Gibutyag ni Anduyan nga dili serbisyo sa katawhan apan puno sa hinangal ang gihimo sa NPA hinungdan angay kining isalikway sa katilingban.
Namatay sa pag-ambush si Corporal Ruel Sumaylo nga taga-Manolo Fortich,Bukidnon samtang samaron ug luwas na sila si Capt Ramil Gighe,Staff Sgt Gerwin Gemilla,Senior ug Master Sgt Jovanie Malinab nga personal nabisita ni Anduyan sa ospital kagahapong adlawa.
Samtang wala matago ni PNP chief Director General Archie Gamboa ang iyang kasuko batok sa NPA rebels nga mibanhig sa convoy ni Salido sa Talakag,Bukidnon.
Kini human nag-resulta sa kamatayon sa ilang usa ka pulis ug laing tulo ang samaron dihang gipaulanan sa mga bala sa M16 ug M14 rifles sa mga rebelde ang police patrol sa Brgy Tikalaan kagahapon sa buntag.
Miingon si Anduyan nga gimanduan sila ni Gamboa nga ihan-ay ang tanang dokumento aron kasuhan sa kasupakan sa international humanitarian law o IHL ang anaa sa 12 ka rebelde nga utok sa hitabo.
