CAGAYAN DE ORO CITY – Namugos ang Cagayan de Oro City Police Office o COCPO nga dili paghatag sa special treatment ang pagpagawas sa prisohan sa police officer nga nagbinastos,nangbahad ug naglasong sulod sa Jakko Grill restobar sa Upper Carmen sa syudad.
Kini human kompirmaha ni Carmen Police Station commander Maj Jelesis Teves nga gi-kustodiya niya si Police Capt Calvin Nario Placer Jr., 35 anyos nga taga-Rosewood, Butuan City sa iyang buhatan gikan sa Maharlika Detention and Rehabilitation Center sa syudad.
Miingon si Teves nga gilikay lamang una niini si Placer kay aron dili makapasakit o maoy mahinaykan sa mga kauban nga piniriso sa maong bilangguan.
Si Placer ang giakusahan nga naglasong ug nangulata’g mga trabahante dihang bugnaw nga gitagad sa babaye nga iyang na-interesan niadtong kadlawon sa Valentines Day celebration sa dakbayan.
