CAGAYAN DE ORO CITY – Gipamugos sa kontrobersyal ug naka-floating status nga si Police Lt Col Jovie Espenido nga wala siya’y labot sa kapi’g 300 ka suspected police drug protectors sa nasud.
Kini bisan nga mismo si DILG Sec Eduardo Anio ang nagkompirmar nga kabahin ang pangalan ni Espenido nga anaa sa watchlist ni Pres Rodrigo Duterte nga nalambigit sa ilegal nga dorga.
Miingon si kanhi PNP chief director general ug karon Sen Panfilo Lacson nga personal nga mipasabot kaniya si Espenido ug naghatag sa report gikan sa adjudication board aron ipahibalo nga wala siya’y labot sa bag-ong lugwa nga illegal drug watchlist ni Duterte.
Apan giklaro ni Lacson nga kon may laing basehan ang PNP kon nganong anaa gihapon ang pangalan ni Espenido kinsa responsable pagpatay sa suspected druglord nga si late Ozamiz City Mayor Reynaldo ‘Aldong’ Parojinog Jr’ angayang imbestigaran ug manubag kini kon makit-ang sad-an.
Samtang pag-ilad sa kaugalingong katawhan ang gihimo ni Pres Rodrigo Duterte kon nganong wala niya santa-a si Espenido sa giingong pagsilbing illegal drug protector dinhi sa nasud.
Kini kon dugay nang nasayod si Duterte apan gipasagdan ug gigamit pa niini si Espenido sa iyang giyera kontra mga sindikato sa ilegal nga droga.
Kini ang reaksyon ni kanhi Magdalo partylist Rep Gary Alejano sa pagka-apil sa pangalan ni Espenido sa ilegal drugs watchlist ni Duterte ning tuiga.
Miingon si Alejano nga mahimong na-tintal ang maong pulis sa salapi rason nga nasulod ang iyang pangalan sa listahan ni Duterte.
Nahimong ilado si Espenido tungod sa kamatayon nila ni Albuera Mayor Rolando Espinosa sa Leyte ug Ozamiz City Mayor Reynaldo ‘Aldong’ Parojinog Jr nga gihulagway ni Duterte nga suspected druglords sa nasud.
