CAGAYAN DE ORO CITY – Misaka na sa upat ka sakop sa robbery organized group ang napatay sa police operating teams nga unang nakigpinusilay sa mga pulis sa checkpoint sa Libertad,Misamis Oriental sa miaging mga adlaw.
Kini human giingong nangilog sa armas sa mga police escort ang mga dinakpan nga sila si Richardson Perez taga Cebu City ug Mickey Abellana nga taga Tangub City, Misamis Occidental samtang padulong sila sa Misamis Oriental Provincial Jail hinungdan nga napatay kagahapon sa udto.
Apan gitin-aw ni Laguindingan Police Station Commander Capt. Arlyn Ranario nga dili na siya makahatag dugang detalye kon nganong nakasukol ang mga suspek taliwala nga nakaposas kini.
Kahinumduman nga napatay usab sa shootout si alyas Bolaw kinsa maoy gitudlo nga mipatay kang Police Staff Sargeant Ronald Caayupan dihang misukol gihapon sa mga pulis.
Una nang napatay usab sa engkwentro sa mga otoridad ang drayber sa Mitsubishi Mirage nga si Jephone Fabriga Tinamisan nga taga-Ozamiz City sa miaging Lunes sa gabii.
Samtang paimbestigaran ni Misamis Oriental Provincial Police Director Colonel Robert Roy Bahian ang mga pulis nga nakapusil-patay sa duha ka sakop sa Perez Robbery Organized Syndicate diha sa Brgy Sinai, Laguindingan,Misamis Oriental kagahapong adlawa.
Siya miingon nga gusto niyang mahibal-an kon walay lapses nga nahimo ang mga otoridad hinungdan nga nakapangilog sa armas ang mga suspek nga sila si Perez ug Abellana nga gitakdang dalhon na unta sa provincial jail ning syudad.
Nagbahad si Bahina nga dili makalusot sa kasong kriminal ug administratibo ang mga pulis kon ugaling mapamatud-an nga tinuyo ang pagpatay sa mga suspetsado.
