CAGAYAN DE ORO CITY – Gipangandaman sa Cagayan de Oro City Police Office o COCPO ang posibleng legal action sa maglive-in partner nga na-raid subay sa mando sa korte diha sa Punta,Brgy Bonbon sa syudad.
Kini human unang nakadawat sa impormasyon si Carmen Police Station commander Maj Jelesis Teves nga kaila nila ni Eduardo Orangyo ug Rebecca Dahjin ang mga suspek nga gika-engkuwentro sa kapolisan sa Libertad ning lalawigan.
Miingon si Teves nga nag-negatibo ang paglusob nila sa pinuy-anan ug tindahan sa maong mga negosyante kay posibleng nadala na sa mga suspek ang mga armas nga hayan gigamit nila batok sa mga pulis sa miaging Lunes sa gabii.
Dumduman nga narekober gikan sa mga suspek ang upat ka kalibre 45,upat ka granada,duha ka KG9 rifles ug 9mm pistol nga gisakay sa kolor puti nga Mitsubishi Mirage nga gipag-iya sa maong mga negosyante.
Samtang gihimakak sa negosyante nga si Eduardo Orangyo ang pasangil nga nagbaton sila’g mga armas rason nga gi-raid sa kapolisan diha sa Punta Bonbon,Brgy Bonbon ning syudad.
Miingon si Orangyo nga kaila nila sI Jephone Fabriga Tinamisan kay bana kini sa ilang babayeng empleyado nga taga-Tangub City,Misamis Occidental.
Apan namugos si Orangyo nga wala sila’y kasayuran kon unsa pa ang kalihukan ni Tinamisan kay but-an man kini nga makig-atubang kanila dinhi sa syudad.
Una niini,gihupay sa ilang abogado nga si Atty Ange Lim nga wala na sila’y plano nga mokaso batok kapolisan.Kini bisan kon nabutang sa kontrobersya ang ilang pribadong kinabuhi nunot sa hitabo.
