(Update) CAGAYAN DE ORO CITY – Misaka sa 12 ka tawo ang patay sa ngilngig nga pagkaybol sa elf-truck nga iya sa aktibong brgy kagawad nga nagsilbing service sa 52 ka tawo gikan lungsod Claveria ug aron unta maligo’g dagat sa Lagonglong,Misamis Oriental.
Kini human nadisgrasya ang ang trak nga gimaneho ni Junriel Cagmat pag-abot sa pabahada ug kurbada nga bahin sa Purok 4,Sitio Bagaay,Barangay Baliwagan,Balingasag kagahapon sa buntag.
Subay ni Provincial Health Office head Dr Jerie Calingasan nga sa mismong hitabo,gilayong unom ang namatay samtang laing tag-tulo pag-abot sa Balingasag Provincial District Hospital ug diha sa Northern Mindanao Medical Center.
Miingon si Calingasan nga daghan pa sa mga biktima nga naa sa NMMC ang peligro ang kahimtang tungod sa mga bun-og nga ilang naangkon sa aksidente.
Samtang naka-hospital arrest ang driver nga kabahin sa samaron sa pagkabalintong sa elf-truck padulong sa basakan.
Kini samtang gihulat ang hukom ang mga tagtungod sa mga namatay’ng biktima ug mga samaron sa maong aksidente.
Gibutyag ni Balingasag Police Station commander Maj Teodoro de Oro nga pipila sa mga namatay mao sila siElizabeth Bagabaldo,Allan Cadenas,magtiayong Joseph ug Susan Dalanta,Loling Sinag-od,Estela Mara-on,Cristina Cadenas ug mismong helper ni Cagmat nga si Niño Lañasa nga tanan taga-Sitio Impakebel,Barangay Aposkahoy,Claveria.
Samtang gikompirmar usab ni De Oro nga giandam na nila ang patung-patong nga kasong kriminal nga ipasaka sa piskalya batok suspek.
